ENCONTRO PROFESIONAL: MIRARSE DE FRONTE. O LADO HUMANO DOS FESTIVAIS

OBSERVATORIO

Actividade só para persoas acreditadas

Nestes tempos de despersonalización e virtualidade, dedicamos o noso encontro profesional a reivindicar o papel dos festivais como artífices de comunidade. Tras o auxe dos espazos virtuais dos últimos anos, é necesario pensar estratexias para poñer en primeiro lugar a presencialidade e para manter espazos en que se fomente a calidez do encontro cara a cara. Ao longo das nosas xa dezaseis edicións, vimos como a Mostra foi xerando sinerxías a través do trato humano, lazos que terminan sendo xermolo de colaboracións e, por que non dicilo, de afinidades e amizades duradeiras. Neste encontro profesional, ofrecemos un espazo a todas as persoas asistentes ao festival para reforzar os devanditos valores, aglutinando as diferentes patas do sector: formación, produción, distribución e pensamento, que se ven representadas pola presenza de programadores (de citas como o Forum Expanded da Berlinale, Curtas Vila do Conde, Porto/Post/Doc, FICXixón ou SACO), críticos, cineastas, profesionais, académicos, estudantes e docentes (de centros como a Universidad Complutense de Madrid, a Universidad de Salamanca, a Universidade de Vigo, a EQZE ou MASTER.LAV). Xuntos pensaremos en formas de impulsar esta faceta orgánica da comunidade entre eventos e de crear pontes entre institucións deste ecosistema do cinema de vangarda.