MARTA VALVERDE

A fluidez á hora de moverse entre disciplinas anima o traballo de Marta Valverde: ademais de asinar pezas audiovisuais monocanle como as que aquí presentamos (Blanco y fucsia e El tiempo suspendido), achégase ao traballo multipantalla, o live cinema, a fotografía, a instalación e os visuais para teatro e representacións escénicas. Como ela mesma sinala, os seus intereses diríxense cara á intimidade, a memoria e a autobiografía en obras que se expanden, tal e como ocorre en Blanco y fucsia, alén da pantalla. Un traballo que captura o espírito do seu tempo e os códigos da súa xeración do único xeito posible: a través dunha obra híbrida cunha fonda conciencia estética, na que o persoal é o universal.