XORNADAS DE CINEMA PARA CENTROS PÚBLICOS DE ENSINO

DIDÁCTICA

Durante os últimos anos, o (S8) inclúe na súa programación previa aos días da Mostra unhas xornadas de cinema para centros públicos de ensino co obxectivo de ampliar o radio de acción do festival, afianzando o seu compromiso coa formación e a creación de novos públicos. 

Durante o mes de maio de 2023, o museo Domus-Casa do Home da Coruña acolleu varios programas especiais para centros públicos de diferentes cidades de Galicia. Un ciclo de proxeccións para nenas e nenos de entre 10 e 16 anos composto por catro sesións en versión orixinal, con películas cuxa temática se move entre o social e o coidado do medio natural, mostrando tamén obras de narrativa experimental. A través destas películas, algunhas delas contadas desde a perspectiva dos propios nenos e nenas protagonistas, bríndaselles aos espectadores mozos a ocasión de se asomaren á realidade dos seus pares doutros países e contextos e de coñeceren outras linguaxes do cinema.

As xornadas contaron este ano coa participación dos seguintes centros: IES Urbano Lugrís, CEIP Concepción Arenal, IES Ramón Menéndez Pidal, CEIP Víctor López Seoane e IES David Buján.