ELOY DOMÍNGUEZ SERÉN

Pódese considerar que o motor do cine de Eloy Domínguez é a experiencia: toda a súa filmografía está atravesada por unha ollada curiosa a través da cal se relaciona cos lugares que habita, xa se trate de Suecia, Sahara ou Galicia. Neste especial de Sinais en curto presentamos dúas pezas que parten de derivas que desbordan o real de varios xeitos: por unha banda, a ficción oblicua que propón Rust a través dunha apocalíptica localización sueca; por outra, o retrato sensorial que fai en Os corpos do transo do entroido galego, unha tradición pagá exaltada e delirante. Dúas pezas nas que o protagonismo do son é esencial, e que nos serven para falar con Domínguez do seu cine e das vivencias detrás deste.