Emiliano Reyes é o autor de The Toronto Symphony Orchestra conducting Tchaikovsky (1945), proxecto gañador desta novena edición de BAICC – Residencias Artísticas Internacionais de Creación Cinematográfica 2026/27. A comisión de valoración integrada por un representante de cada unha das tres entidades responsables da convocatoria, AC/E – Acción Cultural Española, (S8) Mostra Internacional de Cinema Periférico da Coruña e Liaison of Independent Filmmakers of Toronto – LIFT, seleccionou esta, de entre unha veintena de propostas, para que sexa desenvolta ao longo de catro semanas entre setembro e outubro de 2026 en Toronto (Canadá).
The Toronto Symphony Orchestra conducting Tchaikovsky (1945) articúlase baixo principios estruturalistas e de reinterpretación de metraxe atopada: unha peza rodada en 16mm en Toronto no ano 1945. Un proxecto tecnicamente sofisticado, novidoso e refrescante que abraza tamén a abstracción visual e a intervención táctil. A película transmutará nunha coreografía abstracta de luz rítmica, gran fregado e texturas cinéticas onde o colapso visual da imaxe correrá parello á intensidade dramática da composición de Tchaikovsky.
O resultado desta residencia artística, concebido como unha instalación multipantalla de tres proxectores de 16mm, poderá verse en estrea mundial durante a próxima edición do (S8) XVIII Mostra Internacional de Cinema Periférico en xuño do 2027, na Coruña.
Emiliano Reyes (Cidade de México, 1999) é cineasta e artista audiovisual licenciado en Cinematografía e Artes Audiovisuais e graduado de máster LAV. A súa práctica céntrase no cinema documental, cinema experimental e cinema expandido. O seu traballo en fílmico explora os límites formais, profundando en procuras sociais, políticas e poéticas. Os seus proxectos e instalacións exhibíronse en festivais como Tirana International Filme Festival, CineYouth Chicago Filme Fest, Intermediaciones Filme Festival, Euroshorts, Festival Proxector e o propio (S8), entre outros.
BAICC– Residencias Artísticas Internacionais de Creación Cinematográfica 2026/27 é un proxecto de eSe8_LAB en colaboración con Acción Cultural Española (AC/E) e o LIFT-Liaison of Independent Filmmakers of Toronto.
